blog de novas

O regreso de Ron e Buxo

2011-11-28T10:34:00.001+01:00

Fai case 6 anos publiquei LAS AVENTURAS DE AMO RON, o último fanzine de CERDITOS DE GUINEA, antes de comezar coa nosa aventura editorial. O álbum de 60 páxinas foi tamén o noso último traballo en branco e negro e en castelán.

Aquela historia recuperaba a Ron e o seu inseparable lacaio Buxo, dous personaxes que naceron un par de anos antes en formato de tira cómica para a revista lucense ENTREMUROS. A historia titulábase EL SECUESTRO DE LA PRINCESA SAADA e narraba durante catro capítulos, en clave de humor negro, a misión de rescate dos nosos protagonistas.

Pois ben, a imaxe de arriba é a portada do número 1 da nosa nova serie Ron, que publicaremos en branco e negro e formato comic-book
(25 x 17 cm e 20 páxinas grampadas). A serie irá dividíndose por actos, encaixando cada un deles en cada número da colección.

Para este primeiro número contamos con dous detalles de luxo, por un lado a preciosa ilustración da contraportada a cargo de Pintu, un dos mellores debuxantes de pinups do noso país, e, por outro, a estampaxe de tinta prateada no logo da portada.

Ron, unha mistura entre Conan e Torrente, fai que tamén sexa a nosa primeira serie destinada só para lectores adultos. A serie recupera o espírito dos primeiros fanzines, onde todos os personaxes e escenarios están localizados en Galicia.

Sam Burke e Maximilian Williams únense ao catálogo

2011-09-23T18:54:00.001+02:00

Seguramente os nomes de Sam Burke e Maximilian Steven Percival Williams III non vos din nada, pero se falamos dos detectives Sam e Twitch creados por Todd McFarlane para a súa serie franquía SPAWN a cousa cambia.

O acordo entre CERDITOS DE GUINEA e TODD MCFARLANE PRODUCTIONS deixaranos desfrutar en galego dunha das mellores series de xénero policial escrita polo actual cerebro do universo MARVEL.

O arco argumental elixido é UDAKU, e comprende os 8 primeiros números USA, debuxados por Angel Medina e con guión de Brian Michael Bendis. A serie foi publicada en USA entre agosto do 1999 e marzo do 2000.

SAM E TWITCH seguiu as súas andanzas ata os 26 números, pero os retrasos nas entregas e o descenso das vendas fixeron que terminaran cancelándola. Unha das características principais da serie é a súa temática escura e realista, deixando de lado o clásico argumento dos superheroes e viláns.

A serie destacaba polos seus arcos argumentais longos, xa que nos 26 números só desenvolveron 4 historias, a xa mencionada UDAKU, WITCHCRAFT, BOUNTY HUNTER WARS e THE JOHN DOE AFFAIR (onde McFarlane recolle o testemuño de Bendis ao guión).

Un par de meses despois McFarlane relanzou a serie baixo o título CASE FILES: SAM & TWITCH, pero o novo estilo gráfico e as tramas de Marc Andreyko distanciaronse por completo do universo SPAWN que desprendían os primeiros números da serie e cancelouse aos 25 episodios.

O ano pasado, a miniserie de 4 números THE WRITER devolveu os nosos protagonistas á actualidade grazas a Luca Blengino e Luca Erbetta.

E por se tiñades curiosidade, a imaxe de arriba corresponde aos bonecos da SPAWN SERIES 25 (producidos no 2004) e baseados na imaxe de portada do número 22.

A chave do tempo, o novo álbum de Gárgolas

2011-08-17T22:58:00.004+02:00

Durante a última semana estivemos na caseta número 10 da Rúa da BD dentro do marco do festival internacional VIÑETAS DESDE O ATLÁNTICO. Neste evento púidose adquirir por primeira vez o esperado tomo 2 de GÁRGOLAS: A CHAVE DO TEMPO.

Se de algo podemos estar orgullosos dende CERDITOS DE GUINEA é do importante número de seguidores que xerou esta serie e da súa boa recepción. Neste álbum volta D-P Filippi no guión pero non J. Etienne, que deixa o seu sitio ao italiano Silvio Camboni. O debuxante italiano encaixa á perfección no estilo da obra, xa que vén de traballar para WALT DISNEY en TOPOLINO e PAPERINIK, que é o nome italiano co que se coñecen Mickey Mouse e Duck Avenger, a versión superheroica do Pato Donald (podedes ver unhas espectaculares páxinas orixinais pinchando aquí).

Camboni aporta ao álbum un traballo máis limpo grazas á súa liña clara e definida, ademais vén acostumado ao pequeno tamaño no que se editan as publicacións DISNEY, polo que o uso dos planos elixidos encaixa á perfección no tamaño no que editamos o álbum (abaixo podedes ver o traballo a lapis na portada do tomo 2).

Nesta ocasión Gregor volta ao século XVII coa misión de atopar unha chave máxica que lle axude a completar o seu adestramento como aprendiz de mago; ao mesmo tempo que terá que rescatar ao gato-musa (un felino peludo bardalleiro que serve de inspiración aos grandes xenios da humanidade).

Tampouco poden faltar os inimigos e seres escuros que traballan para a malvada Aglaia, onde destaca por riba de todos un enorme voitre púrpura. A volta dun poderoso aliado ou a súa relación cunha misteriosa rapaza con poderes completan este entretido arco argumental.

A edición desta BD complétase cun simpático caderno de feitizos, un resumo de todos os meigallos aprendidos ata agora por Gregor. A serie GÁRGOLAS continúa con bo pé na súa edición francesa, onde se prepara o sétimo álbum. Deixámosvos as portadas destas BD para abrir boca mentres preparamos a súa chegada ao noso idioma.

Aproveitamos este evento tamén para presentar o noso cambio de imaxe online, xa que redeseñamos a web buscando maior claridade e accesibilidade aos contidos por parte dos usuarios. Na presentación oficial do álbum que tivemos o xoves 11 ás 13:00 anunciamos tamén o próximo lanzamento dunha versión 2.0 do MANUAL DE EMERXENCIA DE BD, onde engadiremos un anexo adicado en exclusiva ao manga para complementar o noso obradoiro especializado neste xénero.

Por último, e a pedimento popular de case todos os visitantes que pasaron pola nosa caseta, colgamos a imaxe que usamos durante a feira para mostrar o noso apoio como socios e seguidores do Dépor. (Porque nesta casa nos gustan as viñetas, pero as blaquiazuis por riba de todo.)

Guía de emerxencia do mundo de LUCHA LIBRE

2011-08-06T00:36:00.001+02:00

Aproveitando a saída do número 2 de OS CINCO LOITADORES, facilitámosvos unha pequena guía de emerxencia para saber localizar a nosa publicación dentro do bizarro mundo de Lucha Libre.

Todo empezou no 2006 coa publicación da revista colectiva LUCHA LIBRE, onde o autor norteamericano Jerry Frissen facía os guións dunha serie de personaxes relacionados co mundo da loita mexicana. Dentro desta publicación, Frissen escribía diversas historias debuxadas por autores como: Gobi, Bill, Fabien M., Hervé Tanquelle, Nikola Witko, Romuald Reutimann ou Christophe Gaultier. Nesta BD apareceron as primeiras andanzas de LUCHADORES FIVE (os nosos CINCO LOITADORES), TEQUILA ou THE TIKITIS. Na imaxe de abaixo podedes ver unha selección das portadas desta revista.

A medida que se ían creando historias destes personaxes, LES HUMANOIDES ASSOCIÉS foi recompilando todas estas páxinas en tomos individuais. En Francia xa se publicaron 3 álbums de LUCHADORES FIVE (que é o formato que nós publicamos). Tamén levan publicados 3 álbums de TEQUILA, o antigo membro dos CINCO LOITADORES que leva a súa nova vida nun parque de caravanas, e outros tantos de THE TIKITIS, un grupo de científicos retirados nunha pequena illa e encargados de vixiar a KING KATCH Ademais tamén saíu á rúa un álbum de LUCHADORITOS, unha recompilación de historias cortas dun rapaz obsesionado coa loita libre.

No 2007 foi a compañía IMAGE COMICS a que lanzou as historias de LUCHA LIBRE no mercado norteamericano, comercializando un ano despois os tomos integrais baixo o lema “Heroing's A Full Time Job (Tips Appreciated)”*

*Heroes a tempo completo (Acéptanse propinas)

Un dos atractivos deste mundo creado por Jerry Frissen son as figuras de PVC dos personaxes comercializadas por MUTTPOP, podedes saber máis sobre isto lendo as páxinas extras que vos ofrecemos no número 1 dos CINCO LOITADORES.

Pola miña banda, déixovos unha foto do boneco dun dos meus personaxes favoritos, O PANDA, inspirado en OOLONG de DRAGON BALL (xa que Frissen é un declarado fan das obras de Akira Toriyama).